Ambasadorët e vendeve të QUINT-it, janë takuar sot me kryeministrin e Kosovës, Albin Kurtin. Ky takim vjen pas masës së reciprocitetit për targat e Serbisë, të vendosur të hënën nga Qeveria e Kosovës. Pas hyrjes në fuqi të reciprocitetit ndaj targave të Serbisë, forca të shumta policore u vendosën në pikën kufitare në Jarinje. Sipas vendimit të Qeverisë së Kosovës, mjetet me targa të Serbisë nuk do të mund të hyjnë në territorin e Republikës së Kosovës, pa u pajisur me targa të përkohshme “RKS”. Pagesa për targat e përkohshme është 5 euro dhe vlefshmëria e saj është 60 ditë.
Siç raportojnë mediat serbe, presidenti serb tha se Serbia kërkon tërheqjen e të gjitha trupave që po qëndrojnë në veri të Kosovës, si dhe një përgjigje urgjente nga BE -ja për situatën.
Presidenti serb e quajti aksion kriminal, pozicionimin e forcave speciale policore në pikat kufitare në Jarinje e Bërnjak, për ta mbikëqyrur zbatimin e vendimit të fundit të Qeverisë për reciprocitetin në çështjen e targave të automjeteve. Vuçiç tha se ai mori një propozim për zgjidhjen e situatës në pikat kufitare në Jarinje dhe Bërnjak dje, por e refuzoi atë, duke e quajtur poshtërues për Serbinë.
“Unë e refuzova sepse nuk është kompromis, dhe sepse e kthen Serbinë prapa. Shkurt është një zgjidhje që përmban 70% të asaj që shqiptarët kishin ndërmend të bënin, në mënyrë që të harrohej kjo. Unë thjesht refuzova, sepse jam lodhur nga politika e aktit të përfunduar dhe sepse ju nuk mund ta bëni këtë”, tha presidenti serb.
