Kryetari i Lidhjes Demokratike të Kosovës, Isa Mustafa është shprehur se grupi i LDK-së ka dhënë mjaft argumente për të drejtën e qeverisë.
Por pavarësisht kësaj, Mustafa tha se LDK do ta respektojë çdo vendim të Gjykatës Kushtetuese. Ai shprehet i bindur se nuk ka bërë asnjë shkelje kushtetuese.
“Është e domosdoshme që vendi të ketë një qeveri të re, pasi kjo qeveri nuk po mund ta menaxhoj situatën duke e shkelur kushtetutën brenda një muaji. Kurti e shkarkoi veten për arsye se i ashpërsoi deri në kufi të patolerueshëm relacionet me SHBA-të, i përkeqësoi marrëdhëniet me vendet e BE-së, por kishte probleme edhe në koalicion.
Jam i lumtur që ka rënë ky koalicion sepse po të vazhdonte, sigurisht që do të kishim probleme edhe me të mëdha. Si mund të funksionojmë një bashkëqeverisje ku një parti del dhe shkarkon ministra pa na pyetur. Kjo nuk ka kuptim sepse në të kundërtën do të thonim eja shkel mbi qafen tonë sepse kemi një marrëveshje”, tha ai.
Sa i përket Vjosa Osmanit, Mustafa tha se ajo nuk po e respekton LDK-në, pasi ka votuar kundër mocionit për rrëzimin e Qeverisë Kurti.
