Prokuroria ka pranuar sot kërkesën e PD-së, për të nisur hetimet dhe verifikimin e të dhënave personale, të kryetarit të Bashkisë së Vorës, Agim Kajmaku.
Më herët ditën e sotme, këshilltari ligjor i PD-së, Çlirim Gjata, doli në një deklaratë për mediat duke akuzuar kryeministrin Rama se po mbron në mënyrë të paligjshme Kajmakun.
Partia Demokratike pretendon se kryebashkiaku i Vorës, ka falsifikuar formularin e dekriminalizimit duke ndryshuar identitetin nga Agim Kajmaku në Jorgo Toro. Kështu, PD i dërgoi një kërkesë zyrtare organit të akuzës për nisjen e menjëhershme të hetimeve për Kajmakun.
Sipas partisë më të madhe opozitare, nga krahasimi i të dhënave të paraqitura nga kreu i Bashkisë së Vorës në formularin e dekriminalizimit, thuhet se ka jetuar prej 5 vitesh në Greqi me emër tjetër me informacionet e sistemit TIMS, se nuk ka udhëtuar asnjëherë në shtetin helen prej 12 vitesh, ngrenë dyshime për pastërtinë e figurës së tij, ndaj duhet t’i nënshtrohet procedurave ligjore.
