Aktori Alex Seitaj njihet për rolin e famshëm “Vezirja” në “Portokalli”.
Ai ka zbuluar detaje pikante në lidhje me jetën e tij në emisionin “ThumbOn” në RTV Ora, ku ka folur për problemet tejet serioze me shëndetin. Alex Seitaj ka rrëfyer një periudhë të vështirë të jetës së tij, adoleshencën në të cilën ai ka kaluar edhe depresion.
Aktori i njohur rrëfeu se ka tentuar vetëvrasjen, ka lënduar veten fizikisht dhe se ishte shumë e vështirë që të dilte nga ajo gjendje. Gjatë intervistës, ai ka thënë se ka arritur deri në atë pikë, sa ka lënduar veten me brisqe e gjilpëra.
“Periudhë e vështirë në jetën time, depresioni. Ishte në kohën kur unë isha adoleshent, në shkollë të mesme kur shumë njerëz nuk e dinë kush janë dhe çfarë do bëjnë me jetën e tyre. Shkollën e mesme e kam bërë në qytetin e Korçës. Ka qenë periudhë e vështirë, e komplikuar. Nuk isha rehat me shumicën. Kisha udhëtuar dhe kisha parë vërdallë.
Doja të organizoja festën e Halloween-it dhe të gjithë ishin të tmerruar nga kjo gjë, sepse nuk e kuptonin festën. Thoshin ç’janë këto tmerre. Kisha disa gjëra që i kisha përgatitur unë, që u grisën. Logjikisht kur je në një ambjent të tillë, ti thua që ka diçka që s’shkon. Mendoja se është faji im. Kam patur mendime vetëvrasjeje pafund. Kam arritur deri në atë pikë, sa kam lënduar fizikisht veten, me brisqe, gjilpëra. Familjarët e mi dinin vetëm fraksione të vogla. Sepse unë isha i zhytur sa nuk hapesha dot me askënd, as e perceptoja fare të flisja me familjen që gjithçka të bëhej mirë.
Kur je në atë dhomë të errët, nuk e mendon se çdo hap drejt shpëtimit është i gabuar. Tentativat për t’u vetvrarë nuk ishin për të tërhequr vëmendje. Këto veprime janë akte të dëshpëruara, që njeriu do ta nxjerrë dufin tek vetja. Në momentin që flasim për problemet mendore, çrregullimet mendore janë të padukshme. Në momentin që unë shihja që shenjat shëroheshin, mendoja se kështu do ndoshte edhe me dhimbjen psikike, do shërohej. Nuk kërkova ndihmë, sepse e dija që në pikën që isha, askush s’do më ndihmonte”, shprehet Alex.
I pyetur se si ia arriti që t’ia dilte mbanë, ai tha se çelësi i suksesit qëndron tek aktrimi. “Si shpëtova? Për mua ka qenë moment interesant, zbulova aktrimin. Rashë në dashuri me aktrimin, një dashuri ekstrem.
Në atë moment thashë unë e dua këtë gjë. Mund të dal të performojë që të gjithë të qeshin me mua, dhe nuk do më ndjejë fare. Gjeta një arsye për të vazhduar që vërtetë e doja. Kështu që edhe këshilla ime është të gjendet diçka, një person pas të cilit të kapeni. Dashuria është motivim shumë i mirë për të vazhduar përpara. Nuk ka patur moment të dytë. Unë vazhdoj të punoj me veten, është punë e vazhdueshme krijimi i balancimit”.
