Prej muajsh, koronavirusi po bashkëjeton me ne. Vaksina mund të përshpejtojë në mënyrë të ndjeshme situatën e pandemisë. Disa vende të botës po përballen me një valë të dytë infektimesh koronavirusi, e disa me të tretën. Çdo ditë e më shumë, njerëzit po i mbajnë shpresat tek ai që quhet “imuniteti i tufës”.
Shefja e Epidemiologjisë në Institutin e Shëndetit Publik, Eugena Tomini, në një intervistë në “Abcnews”, tha se jemi ende shumë larg imunitetit të masës, ndonëse gjatë javëve të fundit ka pasur shifra rekord të të infektuarve.
“Realisht, situata e transmetimit të Covid, ne jemi në një nivel stacionar. Niveli ka qenë edhe më i lartë, para 6 apo 8 javëve. Aktualisht niveli i përhapjes është 1.09. 1.1 për qind. Pra, nivel stacionar. Është e vështirë të themi nëse e kemi arritur një imunitet të tufës. Jemi akoma larg. Masat e kombinuara, me shpresën e një vaksine… të gjitha bashkë mund të sjellin imunizimin”.
Eugena Tomini u shpreh se ky vit duhet të konceptohet si një vit i festimit brenda familjes së vogël. “Jo të shkojmë ne te festa, por festa të vijë tek ne. Duhet të festojmë ngushtë këtë vit”.
