Sikundër shumë ndërtesa të cilat shfaqën probleme pas tërmetit të 26 nëntorit, ishte edhe ai i njohur si “Pallati i Parashqevisë”. Në këtë pallat ka jetuar deri në vitin 1997 këngëtarja e mirënjohur e skenës shqiptare, Parashqevi Simaku. Në ndërtesën në fjalë që ndodhet në Durrës, jetojnë familjarët e këngëtares. Dëmet janë të shumta.
Lëkundjet e 26 nëntorit kanë shkaktuar dëme të konsiderueshme në objektin e ndërtuar 34 vite më parë, në të cilin jetuan edhe shumë personazhe të njohur. “ABC News” ka qenë në ambientet e brendshme të pallatit, ku dukshëm dëmet në godinë janë të mëdha. Suva të rrëzuara dhe mure të plasaritura janë pamjet që të ofron ky pallat.
Ani Simaku jeton me familjen e tij në shtëpinë e hallës së tij, Parashqevi Simaku, ndërsa ka rrëfyer telefonatën që ka patur me të. Shqetësimi i këngëtares ka qenë për familjarët, se sa për dëmet që godina ka pësuar.
Ani Simaku: “Kur e mori vesh, na mori direkt në telefon. E përjetoi shumë keq. Gjëja e parë që pyeti ishte ‘a jeni mirë të gjithë’…përjetimi ishte shumë i keq”.
Pallati i Parashqevisë siç e njohin të gjithë në Durrës, sipas ekspertëve shqiptarë e të huaj, mund të riparohet falë ndërhyrjeve në kolonat mbajtëse. Por vulën finale për këtë objekt do ta vendosin ekspertët izraelitë, të cilët po bëjnë edhe vlerësimin e masës së goditjes që kolonat mbajtëse kanë marrë në tërmetin e 26 nëntorit.
