Partia Demokratike ka reaguar ndaj zërave sipas të cilave, kryetari Lulzim Basha dhe kryeministri Edi Rama kanë patur një takim në sallën VIP në Rinas, ku sot u prit komisioneri për zgjerimin në Europë, Oliver Varhelyi.
Sipas PD-së, këto janë vetëm aludime dhe gënjeshtra për të mbuluar vjedhjen më të madhe të votave në historinë e Shqipërisë nga Rama-Doshi-Rakipi dhe bandat e tyre,
“Nuk ka pasur asnjë takim midis Lulzim Bashës dhe Edi Ramës. Kjo është një gënjeshtër tjetër për të mbuluar vjedhjen më të madhe të votave në historinë e Shqipërisë nga Rama-Doshi-Rakipi dhe bandat e tyre”, deklaroi Partia Demokratike.
Pas takimit me komisionerin Varhelyi, Basha dhe Rama u larguan nga Rinasi në një periudhë kohore prej 2 minutash pas njëri-tjetrit.
Ata dolën nga e njëjta derë për t’u larguar me makinat respective, duke sjellë dyshime se midis tyre ka patur një bashkëbisedim.
Pas fitores së zgjedhjeve parlamentare të 25 prillit, kryeministri Rama ftoi për bashkëpunim kryedemokratin Basha, por ky i fundit nuk ka pranuar, teksa ka hedhur akuza për manipulimin e procesit zgjedhor.
