Situata epidemiologjike e Covid-19 po përkeqësohet nga dita në ditë në vendin tonë, pasi shifrat janë rritur në mënyrë të ndjeshme.
Për këtë arsye, Drejtoresha e Insitutit të Shëndetit Publik, Albana Fico i bën thirrje qytetarëve që t’i respektojnë masat e reja anti-covid.
Fico ka theksuar se janë një sërë masash që duhen respektuar për të pasur sukses.
“Një masë e vetme asnjëherë nuk është e mjaftueshme për të bërë një ndryshim të qenësishëm. Këtë e kemi parë sepse as maska vetëm, as fashat orare vetëm, as kufizimet dhe mbyllje biznesesh vetëm nuk e bëjnë dot një ndryshim. Unë besoj te fakti që të gjitha këto masa që merren, vlerësuar në bazë të situatës, të gjitha në kompleks bëjnë pjesë në mekanizmin e ngadalësimit dhe që ne të shikojmë efektin e një mase, është shumë e vështirë që ne të themi që masa e vetme e bëri ndryshimin. Duhet një fashë 3, 4, 6 javore për të qenë të bindur që ky është ndryshimi që ne prisnim”, u shpreh Fico.
Drejtoresha e ISHP-së, ka shprehur nevojën e pasjes së një vaksine për të ngadalësuar përhapjen e Covid-19.
“Preferoj të flas se çfarë do të ndodhë nëse ne zbatojmë masat, më tepër se sa çfarë do të ndodhë nëse do të ketë një përkeqësim. Të dyja skenaret janë në tavolinë. Çështja është që a kemi ne në dorë të bëjmë diçka kur nuk kemi një vaksinë? Kur nuk kemi një mjekim specific? Kur nuk kemi preparate që janë të targetuara. Por ajo që është shprehur qartësisht në vendimmarrjen e Komitetit është që të vlerësohen javë pas jave dhe këto masa të jenë deri në tre javë. Asgjë nuk është e shkruar në gur dhe unë besoj te drita, pra nëse do të jemi ata njerëz që do të respektojmë masat, sepse në fund të ditës nuk është se si kemi në dorë”, tha Fico në ‘Ora News’.
