Një shqetësim i madh për çiftet që kishin caktuar datën e dasmës, ishte nëse do të mbahej ceremonia apo jo. Pandemia ndryshoi totalisht jetën tonë, ku çdo gjë ndali. Nga ana e autoriteteve, kryerja e ceremonive ishte gjëja e fundit që mund të parashikohej, ndërsa situata po njihte një trend rritës sa i takon të infektuarve.
Ministri i Turizmit, Blendi Klosi, gjatë një interviste në “Real Story”, tha se nga qershori e më tej do të mund të lejohen organizime të vogla.
“A do ketë dasma apo jo? A do bëhet dasma? Këto janë pyetje që shtrohen çdo ditë. Nëse do kemi një lehtësim të masave shtrënguese, mund të kemi aktivitete ceremoniale, në ambiente të hapura, me protokoll. Të gjithë jemi të interesuar. Mund të ketë dasma. Nuk mund ta marr unë këtë vendim”, tha Klosi.
Por pas një takimi që ka mbajtur Klosi me organizatorët e eventeve, Ermal Mamaqi dhe Armand Peza, është vendosur që pas datës 23 qershor të mbahen dasmat.
Ja se çfarë shkruan Ermal Mamaqi në një postim në Instagram:
“Lajm i mire per nuset e Ami Event dhe jo vetëm, për të gjithë Dasmat 2020!
Mbas nje takimi sot me Ministrin e Turizmit Blendi Klosi, si përfaqësues të një industrie shumë të fuqishme për ekonominë Shqiptare (rreth 200Mln Euro/Vit) morem nje lajm te mrekullueshem per te gjithe ata qe kane dasmen ne 2020.
Ne dt 23 Qershor, me lirimin e masave do mundesohet dhe realizimi i ceremonive martesore sipas nje protokolli te aprovuar nga organet perkatese. Me nje nr te reduktuar, duke respektuar distancimin social, do mundemi qe te mbajme premtimin per te realizuar kujtimin tuaj me te bukur. Ju jemi mirnjohës për mirkuptimin në këto ditë të vështira të planetit. @amievent_official @blendi_klosi #Armand Peza”.
