Sizmologu grek, Eftimis Lekkas, ka folur në lidhje me pasgoditjet e tërmetit në Shqipëri, si dhe sa janë mundësitë për një tjetër lëkundje të fuqishme.
Në një prononcim për Klan Tv, sizmologu tha se tërmetet e shumtë që po bien janë një shenjë e mirë, pasi po çlirohet energjia e grumbulluar.
“Tërmeti nuk është gjë tjetër veçse energji. Sa më shumë energji çlirohet, aq më pak mbetet. Kështu, zvogëlohet edhe mundësia që të bëhet një tërmet i madh. Sa më shumë kalon koha dhe vazhdojnë pas tërmetet, pakësohet edhe mundësia që të ndodhë një tërmet i fuqishëm.
Ka shumë pas tërmete dhe kjo është pozitive, sepse ç’tensionon aktivitetin sizmik. Mirëpo, në asnjë rast nuk mund të themi se nuk do të bëhet një tërmet i fuqishëm, kjo shkon përtej fuqive dhe njohurive tona. Megjithatë, fakti se kemi vazhdimisht pas tërmete, është në drejtimin e duhur”, tha ai.
Sipas tij, nuk mund të bëhen parashikime për zonat se ku mund të bjerë tërmeti i radhës.
Këtë nuk mund ta themi. Sa herë që themi diçka, ndodh e kundërta. Nuk kemi ende njohuritë që të themi “ra tërmet në Durrës, tani do të bjerë në Sarandë apo diku gjetkë”. Kjo është mbi fuqitë tona. Natyra funksionon pa u kufizuar prej njeriut. Natyra na urdhëron, nuk e urdhërojmë”, deklaroi sizmologu.
