Në një konferencë me Presidentin e KiE, Charles Michel, kreu i qeverisë shqiptare Edi Rama është shprehur i vendosur se nëse nuk hapen negociatat me Shqipërinë deri në muaj qershor, do ndryshojë kurs. Sipas tij, shkëputja nga rruga e përbashkët e integrimit me Maqedoninë e Veriut, do të bëhet për të shpëtuar nga “kthetrat” e Bullgarisë siç e quajti ai.
“Sa i përket çështjes së Maqedonisë së Veriut, unë e kam thënë. Ia thashë edhe presidentit të Këshillit Evropian, ne jemi absolutisht në një linjë me KiE dhe deri në fund kur të kryhet dhe mbledhja e KiE ku jemi të ftuar të marrim pjesë, e përmbyllet presidenca franceze, ne shpresojmë që Bullgaria të hapë rrugën. Nëse nuk do ndodhë, ne do ndryshojmë kursin gjë që e kemi konsultuar edhe me publikun këtu. E një shumicë e konsiderueshme shqiptarësh kanë thënë që nëse nuk ndodh gjatë presidencës franceze, të shkëputet jo nga Maqedonia e Veriut por të shkëputet nga kthetrat e Bullgarisë.
Presidenti i Këshillit Europian, Charles Michel, deklaroi gjatë konferencës për shtyp se ai së bashku me të gjithë miqtë e Shqipërisë, do të bëjnë gjithçka që të bëjnë të mundur hapjen e negociatave në qershor.
“Keni të drejtë, kjo është arsyeja të theksoj faktin se duhet ti japim energji të reja procesit në BE. Këtë gjë e kam thënë. Ne të gjithë vendet e BE-së duhet të marrim një vendim të përbashkët.
Mund të mbështeteni tek unë dhe te miqtë e qeverisë për të tejkaluar këto sfida dhe të hapim negociatat. Duhet të keni rastin që në nivel udhëheqësish të trajtojmë këto sfida. Jo që ne të gjejmë një justifikim tjetër.
Ishim në Suedi së bashku me kryeministrin, dhe ai më tha që të përfshijmë dhe 27 udhëheqësit e BE-së. Kjo është dhe ajo që po bëjmë, pa pritur një vendim për anëtarësimin. Ne kemi diskutuar dhe një ide të anëtarëve të asociuar, në mënyrë që ne të bashkëpunojmë më mirë me njëri-tjetrin”.
