Pak ditë më parë, Komiteti i Ekspertëve njoftoi se nuk do të ketë kufizim orari natën e 31 dhjetorit, ndonëse në vend është konfirmuar prania e variantit “Omicron” të koronavirusit. Sot, Ministrja e Shëndetësisë, Ogerta Manastirliu apeloi ndaj qytetarëve që të jenë të kujdesshëm. Ajo rikujtoi edhe një herë tjetër se lufta me pandeminë na përket të gjithëve.
“Sigurisht që është shqetësues dhe varianti “Omicron”. Por, kërkohet kujdes i shtuar. Do të lejohen lëvizjet e këmbësore, të njerëzve, por Komiteti ka rekomanduar që festat të jenë me familjen e vogël, me sa më pak kontakte dhe të jenë të vaksinuar/ testuar. Duhet të kuptojmë që lufta me pandeminë, është një luftë që i përket të gjithëve. Të gjithë strukturat shëndetësore janë në këmbë, por duhet të rritet akoma më shumë”.
Ministrja shprehet se Covid-i nuk ka ikur, por po transformohet në variante të tjera. Nga data 4 janar, çdo punonjës administrate duhet të paraqesë pasaportën e vaksinimit, ose testin negativ të Covid çdo pesë ditë.
