Franca ka vendosur masa të reja për udhëtarët, pas shfaqjes së rasteve me variantin e ri Omicron. Ministria për Punët e Jashtme ka bërë një njoftim të rëndësishëm, për të gjithë ata qytetarë që duan të udhëtojnë drejt Francës. Për personat e pavaksinuar, autoritetet franceze kërkojnë plotësimin e disa kritereve. Kërkohet një test PCR negativ me vlefshmëri 48 orë para udhëtimit. Po kështu për tu izoluar gjatë 7 ditëve pas mbërritjes në Francë. Varianti i ri i koronavirusit, i emëruar Omicron, po vazhdon të përhapet nëpër botë, teksa shumë shtete kanë vendosur masa kufizuese. Omicron besohet se është më infektues se variantet paraprake.
Njoftimi
Masat e vendosura nga Republika e Francës, për hyrjet dhe daljet e qytetarëve, në kushtet e Covid-19 dhe variantit të ri OMICRON.
Nga data 02 dhjetor 2021, për udhëtimet nga vende jashtë BE, lejohet hyrja në Francë, pa patur nevojë për një arsye madhore, vetëm të qytetarëve të cilët:
- Kanë kryer ciklin e vaksinimit prej të paktën 28 ditësh për vaksinën me dozë unike Janssen dhe 7 ditësh të 2 dozave të vaksinave Pfizer/Comirnaty, Moderna,AstraZeneca/Vaxzevria/Covishield.
• Personat e vaksinuar, përveç certifikatës së vaksinimit, duhet të jenë të pajisur edhe me një test PCR negativ me vlefshmëri 48 orë para udhëtimit.
• Fëmijët 6 deri 18 vjeç të cilët janë të pavaksinuar, kur shoqërohen nga prindër të vaksinuar, mund futen në territorin francez vetëm me test PCR negativ me vlefshmëri 48 orë para udhëtimit, pa patur nevojë për arsye madhore.
Për personat e pavaksinuar me një nga vaksinat e mësipërme, autoritet franceze kërkojnë plotësimin e kritereve si më poshtë:
• Paraqitjen e një arsye madhore sipas formularit në linkun bashkëngjitur.
• Një test PCR negativ me vlefshmëri 48 orë para udhëtimit.
• Angazhimin për tu izoluar gjatë 7 ditëve pas mbërritjes në Francë.
