Sot, ish-kryeministri Berisha do të dorëzojë firmat për thirrjen e Kuvendit Kombëtar të PD-së pranë selisë blu në Tiranë. Sipas tij, firmat për thirrjen e Kuvendit jo vetëm që janë mbledhur, por numri ka shkuar në plot 4 mijë e 200.
“Për peng-kryetarin kam një lajm shumë të hidhur. Nesër dorëzohen 4200 firma të Kuvendit Kombëtar. I them kryetarit pa parti: përkulu përpara firmave të anëtarëve të PD sepse 4200 kanë firmosur, dhe në atë Kuvend do vijnë 10 mijë të tjerë. Do jetë festa më e madhe në historinë e PD-së. Do jetë triumfi i saj, rikthimi i saj i plotë dhe i sigurt në fitoren vendimtare ndaj narko-shtetit”, deklaroi ai nga qyteti i Pogradecit, ku kishte mbledhur “Foltoren”.
Berisha kërcënon Ramën dhe Bashën
Berisha ka shigjetuar dyshen Rama-Basha, që sipas tij, janë investuar për ta shpallur atë “non grata”. Sipas tij, kryetari i Partisë Demokratike Lulzim Basha, bashkëpunonte me kryeministrin Edi Rama për projektin e miliarderit amerikan George Soros. “Lulzim Basha ishte njëri nga ata të cilët punonte së bashku me Edi Ramën në projektin e George Soros, unë këtë e kisha marrë vesh.
Por kjo nuk më pengonte mua aspak, që të bëja gjithçka për fitoren e Partisë Demokratike”, u shpreh ai. Ndër të tjera, ai nënvizoi se Lulzim Basha nuk e meritoi kurrë drejtimin e PD-së.
“Foltorja është shndërruar në një burim shprese, dhe kjo është merita juaj. Është një gabim i madh i jetës sime që në vitin 2017, kur i kërkova të japë dorëheqjen për humbjen poshtëruese, unë duhet të dilja në garë dhe të shpëtoja PD-në nga një njeri që nuk e meritoi kurrë drejtimin e saj”, tha ai.
Berisha sulmon ambasadoren Yuri Kim
Berisha ndau me simpatizantët në Pogradec, bisedën me kryedemokratin Basha disa ditë para vendimit për pezullimin e tij nga grupi parlamentar demokrat. “Tek sovraniteti, më vjen më thotë, si t’ia bëjmë se ambasadorja e SHBA kërcënon. I thashë e di si është puna Lulzim, i thuaj mos u bëj qesharake me kërcënime. Nuk pyet Berisha për kërcënime. I them që mandatin s’ma heq askush, për sa kohë që ky vend të jetë i lirë dhe jo koloni. S’mund të më diktojë ajo se kush do hyjë në Parlament, dhe kush nuk do hyjë përveç zgjedhësve të këtij vendi”, u shpreh ai.
