Kryedemokrati Basha është treguar i hapur për mediat, ndërsa ka komentuar vendimin e tij për të përjashtuar Sali Berishën. Ai tha se nuk i ka hyrë në hak ish-kryeministrit Berisha, teksa zbuloi se nuk kanë munguar edhe takimet e shpeshta me të. Kryetari i PD-së, Lulzim Basha ka nënvizuar se sa të jetë ai kryetar i partisë, nuk ka për t’u mbledhur asnjë Kuvend Kombëtar, që sipas tij, merr në shqyrtim vendime të qeverisë amerikane. Basha tha se Berisha nuk ka asnjë mbifuqi që ia jep statuti i partisë, për të thirrur institucionet e partisë.
“Kur bëhet fjalë për interesin e shqiptarëve, unë jam peng vetëm i Perëndisë, i Zotit. Dhe me thënë të drejtën, Zotit mund ti kem hyrë në hak por Sali Berishës jo. Për 3 muaj kam bërë çmos për ta zgjidhur këtë çështje. Jam ulur shumë herë me Sali Berishën për të arritur një zgjidhje.
Kam pritur që siç kishte deklaruar këtë betejë ta bënte personale, pa përfshirë PD. Kur këtë vendim nuk e konkretizoi, atëherë kam marrë të vetmin vendim që ishte në favor të PD dhe Shqipërisë. Një person përpiqet për të marrë një parti të tërë peng, vetëm për interesat personale. Para dy muajsh nuk kishte asgjë me mua, tani jam unë armiku.
Katër muaj më parë ne kishim zgjedhje, çdokush mund të mbështeste çdo kandidat, rezultati dihet. Tani më thoni çfarë ka ndryshuar që atëherë. Çfarë ka ndryshuar që atëherë të një individ që përpiqet të tërheqë një parti të tërë në greminë”, tha Basha.