Kancelarja gjermane, Angela Merkel, në prag të largimit të saj nga politika këtë të martë do të zhvillojë një vizitë zyrtare në Tiranë. Vizitën e saj në Shqipëri do e nisë në orën 10:20, dhe i pari që pritet të takojë do të jetë kryeministri Edi Rama. Pritja e kancelares do të nisë në Pallatin e Brigadave, dhe do të përmbyllet me një konferencë të përbashkët mes Ramës dhe Merkel. Më pas do të zhvillohet një takim mes dy delegacioneve në Pallatin e Brigadave, e më tej do të zhvendosen në Tirana Business Park, ku në përfundim pritet që të ketë një konferencë mes kryeministrit Rama dhe kancelares Merkel.
Kjo është hera e dytë që Merkel viziton Tiranën, të dyja herët nën qeverisjen e Edi Ramës. Në kuadër të masave për sigurimin e rendit dhe sigurisë publike gjatë vizitës së kancelares në Tiranë, dhe kryeministrave të Ballkanit Perëndimor, në disa segmente rrugore, për motive sigurie, do të ketë bllokime dhe devijime të lëvizjes së automjeteve; në Rinas-Unaza e Re, Sauk, Rruga e Elbasanit deri tek Pallati i Brigadave.
Me qëllim moskrijimin e mbingarkesës në trafik, nga ora 09:00 deri në orën 13:00 të ditës së sotme, qytetarët të përdorin rrugë alternative për të shkuar në destinacionet e tyre.
