Pak më herët, Komuniteti i Emigrantëve Shqiptarë në Greqi kërkuan nga mediat greke të kërkojnë falje në publik për shpifje dhe manipulim të përsëritur, duke shfrytëzuar shqiptarët në Greqi. Shumë urrejtje pati ndaj shqiptarëve, pasi mediat greke shkruanin vazhdimisht mbi atë dëshmi që dha piloti Charalambos Anagnostopoulos, i cili i kishte marrë jetën bashkëshortes së tij Caroline Crouch.
Vrasësi sajoi grabitjen, ndërsa aludoi se një nga autorët fliste shqip. Kaq mjaftoi që mediat greke të flisnin për bandat shqiptare. Por kjo ngjarje nuk është kaluar kaq lehtë. Gjatë një programi në televizionin Ant1, gazetarit i ka mbërritur një pyetje, e cila hap një debat të nxehtë.
“Si ndiheni dhe ju gazetarët që deklaronit se ata që hynë në shtëpinë e çiftit ishin shqiptarë?”. Drejtuesi i programit nuk e ka shmangur këtë pyetje, por në të njëjtën kohë nuk ka mbajtur përgjegjësi.
“Nuk e thamë ne këtë gjë. Kjo ishte dëshmia e pilotit në polici, që kishte thënë se tre personat që i hynë në shtëpi flisnin shqip. Këto nuk i nxorrëm ne nga barku ynë, por i ka thënë bashkëshorti i 20-vjeçares”.
