Dje, teza e provimit të matematikës doli në rrjetet sociale 30 minuta pasi nxënësit kishin filluar. Maturantët kanë shprehur zhgënjim, pasi niveli i vështirësisë ishte më i lartë seç e prisnin. Pas 2 orësh e 30 minuta, maturantët kanë përfunduar testimin e tretë të Maturës Shtetërore, atë të matematikës.
Pas diskutimesh dhe pakënaqësish lidhur me këtë tezë, Qendra e Shërbimeve Arsimore (QSHA) do të mbajë sot një deklaratë për mediat në orën 11:00, për të dhënë detaje. Po sot është paralajmëruar protestë nga ana e maturantëve, në kundërshtim me tezën e provimit të fundit, ndërsa në vetëm 30 minuta, nisma ka marrë mbështetjen e 2 mijë maturantëve.
“Nesër në orën 11:00 në Qendrën e Shërbimeve Arsimore (QSHA) do të zhvillohet një deklaratë për media në lidhje me detaje nga testi i matematikës, në kuadër të Maturës Shtetërore. Formati është i hapur edhe ndaj pyetjeve të kolegëve gazetarë. Mbrëmje të qetë!”, shkruhet në njoftim.
34 mijë maturantë, më 15 qershor do të japin provimin e fundit, atë të lëndës me zgjedhje, ndërsa janë në pritje të rezultateve të provimeve të kryera.
