Gazetari Çim Peka ka zbuluar disa detaje, për shpalljen ”non grata” nga DASH, të ish-kryeministrit Sali Berisha dhe familjes se tij.
Në emisionin e drejtuar prej tij ”Çim Peka Live” në Syri Tv, Peka kishte të ftuar pikërisht ish-kreun e qeverisë, ku i tha se një ditë para se të shpallej vendimi ”non grata”, kryebashkiaku i Tiranës, Erion Veliaj ndodhej në Uashington.
Gazetari tha se kryeministri Edi Rama merrte Veliajn në telefon për ta pyetur rreth vendimit, teksa ky i fundit i përgjigjet duke thënë se tashmë dihej se çfarë do të ndodhte.
Çim Peka: ”E kam nga burime të sigurta, një ditë para se të shpalleshit “non grata”, e kam nga një dëshmitar oklar, Rama e merrte në telefon Veliajn. Ishte në Amerikë, një ditë para dhe e pyeste: Ti je aty dhe më thuaj çfarë ore del vendimi. Dhe Veliaj i thoshte; pse bën sikur nuk je ti pas kësaj, ti e di kur del vendimi.”
Më 19 maj, Departamenti Amerikan i Shtetit shpalli ”non grata” ish-kryeministrin Sali Berisha dhe familjen e tij.
Lajmi u dha nga Sekretari Amerikan i Shtetit, Antony Blinken i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
Berisha ka vendosur të padisë Blinken në Gjykatën Korreksionale të Parisit për shpifje publike, teksa avokati i tij do të jetë Jean-Yves Le Borgne.
