Sa i takon korrupsionit në zgjedhje, në burg janë lënë Denis Xholi dhe Albjon Çeku. Këta shtetas u kapën me lekë dhe fleta votimi në makinë, para zgjedhjeve të 25 prillit.
Gjykata e Posaçme e Apelit, ka lënë në burg Denis Xholin dhe Albjon Çekun, të arrestuar më herët në dyshimin e korrupsionit në zgjedhje.
Ata u kapën me vlera monetare nga qytetarët në Dibër nga kandidati i PD-së, Luan Haka dhe mbështetësit e PD-së më 22 prill. Lidhur me këtë rast, policia shprehej se “në automjetin me të cilin udhëtonin shtetasit e lartpërmendur, sekuestruan një shumë lekësh, modelar për të orientuar zgjedhësit për mënyrën e votimit si dhe fletëpalosje të një subjekti politik”.
Drejtuesi politik i PD-së në Dibër, Xhelal Mziu, pretendoi atëherë se paratë po shpërndaheshin për të siguruar vota për kandidatin e PS-së, Melaim Damzi. Kjo deklaratë u përgënjeshtrua më vonë nga Shtabi Elektoral i PS-së Dibër.
Si ndodhi ngjarja?
Mbështetësit e Partisë Demokratike bllokuan një makinë në zonën e njohur si rrethrrotullimi i Maqellarës, ku janë gjetur para me preje “50-çe”.
Një person i identifikuar vetëm me emrin “Genti”, kishte informuar kandidatin për deputet nga radhët e demokratëve, Luan Hakën se dy punonjës të Bashkisë së Bulqizës Denis Gjoli dhe Albjon Çeku, po shpërndanin para në këmbim të votave. Pasi ka marrë informacionin, Haka ka vënë në ‘aksion’ mbështetësit e tij, të cilët kanë ndjekur në makinë dy punonjësit, derisa i kanë bllokuar pranë rrethrrotullimit. Në vendin ku mjeti ishte ndaluar, dy të rinjtë nuk janë lejuar që të dalin prej makine, deri në momentin që ka mbërritur policia dhe një prokurore nga Dibra.
Menjëherë sapo kanë mbërritur, efektivët kanë nisur kontrollin e mjetit, duke filluar me numërimin e shumës së parave që gjetën në kroskot.
