Turqia i është rikthyer izolimit, e nga ana tjetër Gjermania ka paralajmëruar për një valë të tretë. Kancelaria gjermane Angela Merkel, ka paralajmëruar qytetarët për një valë të tretë koronavirusi, nëse nuk respektohen masat anti-Covid.
Ajo ka kërkuar nga ana e qytetarëve vetëm ndërgjegjësim, pasi kjo periudhë është tejet e vështirë. Në një video-konferencë me oficerët e policisë, Merkel lëshoi paralajmërimin e fundit, ndërsa pandemia ka mbërthyer fort botën.
“Duhet të vijojmë që të jemi shumë, shumë të kujdesshëm këtë dimër. Në të kundërt do të përballemi menjëherë me valën e radhës”, tha kancelaria Merkel. “Na duhet që t’u mbijetojmë këtyre muajve të dimrit”, shtoi më tej ajo.
Vendi numëron 1.067.473 raste të konfirmuara dhe 16.636 vdekje të lidhura me virusin, sipas Institutit Robert Koch, Qendra Gjermane për Kontrollin dhe Parandalimin e Sëmundjeve.
