Duket se kërcënimet nga ana e Turqisë dhe Greqisë janë lënë pas, falë një ndërmjetësimi nga ana e Francës. Macron dhe Erdogan kanë “ulur shpatat”, e ndërsa në një bisedë prej një ore që kanë realizuar dy liderët, kryefjala ishte tek dialogu.
Presidenti turk, Rexhep Tajip Erdogan, ka realizuar një bisedë telefonike me presidentin francez, Emmanuel Macron. Ata kanë diskutuar për marrëdhëniet Turqi-Francë, Turqi-BE, si dhe situatën në Mesdheun Lindor.
Presidenca turke tha se Erdogan theksoi nevojën për përdorimin e mundësive diplomatike për të de-përshkallëzuar situatën dhe për të arritur negociata të qëndrueshme.
Ministria e jashtme franceze tha se shpresonte që një dialog midis Turqisë dhe Greqisë mund të vazhdonte, dhe se Macron kishte bërë thirrje për një qasje të ngjashme me Qipron.
“Macron e nxiti Turqinë të respektojë plotësisht sovranitetin e vendeve anëtare të Bashkimit Evropian, si dhe të drejtën ndërkombëtare dhe të përmbahet nga çdo veprim i njëanshëm i mëtejshëm që mund të provokojë tensione”, tha zyra e jashtme franceze, duke shtuar se Macron dhe Erdogan kishin rënë dakord për të mbajtur kontakt.
