Instituti Kombëtar i Shëndetësisë Publike të Kosovës ka njoftuar se deri më 31 korrik 2025 janë regjistruar 19 raste të reja me HIV, ndërsa një person ka humbur jetën si pasojë e AIDS-it. Vitin e kaluar u shënuan 34 raste të reja.
HIV është virus që sulmon sistemin imunitar dhe, pa trajtim, çon në AIDS – faza më e rëndë e infeksionit. Infektologët paralajmërojnë për rritje shqetësuese të rasteve, duke theksuar mungesën e informimit te të rinjtë për mënyrat e transmetimit dhe mundësitë e testimit.
IKSHPK rikujton se virusi transmetohet përmes marrëdhënieve seksuale pa mbrojtje, përdorimit të përbashkët të shiringave/gjilpërave, si dhe nga nëna tek fëmija gjatë shtatzënisë, lindjes apo gjidhënies. Ai nuk bartet me përqafim, shtrëngim duarsh, ushqim, ujë, ajër apo pickim mushkonjash.
Në Klinikën Infektive në QKUK marrin shërbime rreth 100 persona të infektuar. Testimi dhe terapia në institucionet publike ofrohen falas.
“Nuk ka informim të mjaftueshëm të të rinjve se si bartet ky infeksion”, tha Murat Mehmeti, shef i repartit për sëmundje seksualisht të transmetueshme në Prishtinë.
Rasti i parë me HIV në Kosovë është shënuar në vitin 1986; që nga ajo kohë janë regjistruar gjithsej 234 raste dhe 53 humbje jete.
