Jeta është e mbushur me mistere, shumë prej të cilave nuk zgjidhen asnjëherë. Por disa enigma duket se sfidojnë hapësirën dhe kohën, arsyen e shëndoshë dhe probabilitetin. Disa mistere e magjepsin ende publikun. Historia e fluturimit 914 të linjës ajrore “Pan America”, ka intriguar vazhdimisht teoricienët e komplotit.
Më 2 korrik 1955, një avion u ngrit nga një aeroport në qytetin e Nju Jorkut në SHBA duke transportuar drejt Floridës 57 pasagjerë dhe 4 anëtarë të ekuipazhit. Pas disa minutash duket se ndodhi diçka e çuditshme, që ua ndryshoi jetën të gjithëve njerëzve që ndodheshin në bord.
Pa asnjë komunikim apo paralajmërim, fluturimi 914 i Pan America u zhduk nga ekranet e radarëve, dhe askush në kullën e kontrollit në Nju Jork nuk mundi të kontaktonte pilotin e avionit apo ndonjë pjesëtar tjetër të personelit, sikur avioni të mos kishte ekzistuar ndonjëherë.
Autoritetet u përpoqën që të gjejnë avionin. Ata supozuan më të keqen: avioni mund të kishte pësuar ndonjë defekt dhe do të ishte rrëzuar. Por pavarësisht përpjekjeve të shumta për të gjetur vendin e rrëzimit, nuk u gjet asnjë gjurmë, asnjë mbetje e avionit dhe as ndonjë nga trupat apo sendet e udhëtarëve.
Pas disa muaj hetimesh, autoritetet arritën në përfundimin se avioni duhet të ishte përplasur në det duke mos lënë pas asnjë gjurmë. Linja ajrore i kompensoi familjet e udhëtarëve për humbjen e të dashurve të tyre dhe çështja u supozua e mbyllur.
Por 37 vjet më vonë gjithçka ndryshoi më 21 maj 1992. Kontrollorët e trafikut ajror në aeroportin e Karakasit në Venezuelë sapo kishin nisur turnin e tyre të punës, kur vunë re befas praninë e një avioni të çuditshëm që hynte në hapësirën ajrore, por ai nuk ishte pikasur nga sistemi i radarëve të aeroportit.
“Ne mund t’i shihnim avionët me sy të lirë, por sipas radarit atje nuk kishte asgjë!”-shpjegoi një nga kontrollorët e trafikut ajror. Një kontrollor tjetër De la Korte, mori një sinjal kontakti nga aeroplani misterioz “Ku jemi? Çfarë dreqin po ndodh?”- pyeti piloti i avionit.
“Ne jemi fluturimi 914 i ‘Pan America Airways’ nga Nju Jork në Majemi me një ekuipazh prej 4 vetash dhe 57 pasagjerë”-tha piloti. Ky njoftim i pabesueshëm i shtangu kontrollorët në kullë. Duke u përpjekur të ruante qetësinë De la Korte, nisi t’i bënte pilotit disa pyetje. Ai e pyeti nëse kishte pasur ndonjë problem gjatë fluturimit të tij, dhe duke ia bërë të ditur se ai ishte qartësisht jashtë kursit, ose 1800 km në drejtimin e kundërt nga destinacioni.
Piloti u përgjigj se ai ishte planifikuar të ulej në Aeroportin Ndërkombëtar të Majemit në orën 9:55 të mëngjesit të datës 2 korrik 1955. Pastaj ai i tha De la Kortes se diçka nuk funksiononte në bord, ndaj De la Korte e njoftoi pilotin se :”Kapiten, ky është Aeroporti Ndërkombëtar i Karakasit, dhe është data 21 maj 1992”.
Ai i tha pilotit të qëndronte i qetë, duke e vënë në dijeni se kishte dërguar një ekuipazh për ta takuar teksa avioni po përgatitej të ulej. Kontrollorët e trafikut ajror u habitën me atë që panë, avioni që po afrohej ishte shumë i vjetruar krahasuar me avionët më modern me të cilin ishin mësuar të punonin.
Stafi i aeroportit e orientoi avionin të ulej në tokë, dhe rojet e sigurisë po përgatiteshin t’i ndihmonin udhëtarët brenda. Por kur ata iu afruan pilotit, ai bërtiti:”Jo mos u afroni, po largohemi tani”, dhe e ktheu avionin në pistën më të afërt, dhe u ngrit sërish në ajër, duke lënë të pataksuar stafin e aeroportit venezuelian.
Ndërkohë 3 avionë të Forcës Ajrore të Venezuelës u përpoqën ta gjurmonin, por në mënyrë misterioze ashtu siç ndodhi përpara mbërritjes, avioni nuk ishte i gjurmueshëm nga radari, dhe ushtria nuk ishte në gjendje të gjente vendndodhjen e tij. Kur avioni u gjet sërish, kjo gjë solli shumë më shumë pyetje sesa përgjigje.
Vetëm disa orë pasi u largua papritur nga Aeroporti Ndërkombëtar i Karakasit në Venezuelë, avioni mbërriti në Aeroportin Ndërkombëtar të Majemit, ku ishte planifikuar të ulej 37 vjet më parë. Edhe aty i gjithë stafi u habitën se si kishte mbërritur ai avion në atë gjendje.
Ku kishte qenë për 37 vjet më radhë? Pas largimit të pilotit, bashkë-piloti, ekuipazhi dhe pasagjerët u morën për orë të tëra në pyetje nga zyrtarët e sigurisë.
Kishte kaq shumë pyetje që nuk kishin përgjigje, ose që nuk kishin përgjigjen e duhur. Një nga aspektet e frikshme ishte se asnjëri nga pasagjerët në bordin e avionit nuk ishte plakur pavarësisht se kishin kaluar 37 vite. Zyrtarët ngritën supet sesi avioni ia doli të fluturojë për një kohë kaq gjatë.
Por edhe nëse bëhej fjalë për një ”udhëtim në kohë”, ajo që kishte qenë vetëm disa orë për ekuipazhin dhe pasagjerët, ishin plot 37 vjet për në të tjerët. Historia e fluturimit 914 u bë burimi frymëzimi për shumë teori konspiracioni.
Burimi i lajmit: https://medium.com/@engrodusedavidoluwadamilola/a-missing-plane-from-1955-landed-after-37-years-heres-what-happened-myth-5f09f51bf3ba
Përshtati TIRANA TODAY
