Kreu i grupit parlamentar socialist, Taulant Balla, ka akuzuar djalin e ish-kryeministrit Sali Berisha se ka blerë prona me vlerë 1.8 milionë euro.
Ai ka publikuar dokumentet, teksa shigjeton Shkëlzen Berishën se nuk i justifikon paratë që ka përdorur për blerjen e pronave.
Balla ka shpërndarë në rrjetin Facebook, disa artikuj investigativë nga mediat, ku thuhet se kompania “Logal shpk”, në pronësi të Shkëlzen Berishës ka blerë disa prona te zona e Gërdecit.
Më konkretisht, në 24 dhjetor të 2018, Shkëlzen Berisha, përmes kompanisë Logal shpk, të cilën e zotëron me 100 % të aksioneve, ka marrë një kredi me vlerë 1.8 milionë euro pranë një banke të nivelit të dytë.
Si garanci për këtë kredi, Shkëlzen Berisha deklaron se ka lënë 6 pasuri të paluajtshme (arë, troje dhe ndërtesa), të cilat thotë se i ka blerë me kredinë në fjalë.
Statusi
Sa herë që mbi dy djemtë e Sali Berishës, Zeni dhe Luli, dalin prova të rënda të korrupsionit, ata nuk përgjigjen, duke i bërë bisht përgjegjësisë publike. Zeni ia le babait t’i dalë në mbrojtje, ndërsa Luli ia kalon kunatit. Zeni nxorri sot Saliun të merrej me një Zyrë Poste në Librazhd, ku ndahet ndihma ekonomike për familjet në nevojë.
Çështja është e thjeshtë:
SHKËLZEN BERISHA KA MARRË NGA BANKA KREDI 1.8 MILIONË EURO ME KOLATERAL PRONAT E KRIMIT MAKABËR NË GËRDEC. SI U BË ZENI PRONAR I ATYRE PRONAVE MILIONËSHE?!
BASHKANGJITUR EDHE AKTI I SHIT-BLERJES.
Kush ëndërroi apo u zhgënjye se Berishët dhe Lulat ia hodhën pa u përballur me drejtësinë, e ka shumë gabim. Në ditët në vijim një kallzim i plotë për këtë skemë pastrimi parash korrupsioni.
Byroja Kombëtare e Hetimit dhe SPAK të hetojnë çdo dosje korruptive.
