Klubi i Skënderbeut po shpreson për një ulje të dënimit të UEFA-s nga Gjykata Federale në Zvicër.
Skuadra beson se përjashtimi nga Evropa mund të përgjysmohet, pra të zbresë në 3 vjet. Pavarësisht se presidenti i Skënderbeut, Ardian Takaj, ka këmbëngulur vazhdimisht se klubi i tij është i pastër, sërish nuk pritet që Gjykata Federale në Zvicër t’ia heqë plotësisht dënimin.
Burime pranë numrit 1 të korçarëve, bëjnë me dijë se objektivi më i mundshëm është ulja e dënimit, më saktë përgjysmimi i tij. Skënderbeut aktualisht i kanë mbetur edhe 7 vite, por me gjasë, duke u kualifikuar edhe këtë vit për në Ligën e Evropës, t’i mbeten 6 vjet për t’u shlyer.
Skënderbeu u dënua fillimisht nga UEFA me 10 vjet përjashtim nga kupat e Evropës, dhe me 1 milionë euro gjobë. Ndaj klubit rëndonin akuzat për manipulim të rezultateve në Champions dhe në Ligën e Evropës, në turet eliminatore dhe në fazën e grupeve.
