Kryeinspektori i Përgjithshëm, Shkëlqim Hajdari ka komentuar situatën politike në vend dhe negociatat për Reformën Zgjedhore.
I ftuar në rubrikën “Opinion” në News24, Hajdari u shpreh se ngecja është normale, duke theksuar se ndryshimet duhet të kishin nisur që pas zgjedhjeve të vitit 2017.
Sipas tij, ndryshimet e fundit kushtetuese të bëra në vitin 2008 i kanë marrë sovranitetin popullit, pasi ata nuk kishin mundësinë për të deleguar dëshirat e veta nëpërmjet deputetëve. Hajdari u shpreh optimist se do ketë marrëveshje mes palëve.
“Ngecje normale sepse politikanët shqiptarë me reformën zgjedhore duhet të merreshin menjëherë pasi dolën rezultatet e zgjedhjeve të vitit 2017 nga OSBE-ODIHR dhe kishin gjithë kohën e domosdoshme në dispozicion që të bënin jo thjesht ato ndryshime që lidhen me rekomandimet e OSBE-ODIHR por edhe ndryshime të tjera më të thella që lidhen me zgjedhjet, me marrëdhëniet e deputetëve ndërmjet partive, që lidhen me konkurrencën që duhet të kenë deputetët që shkojnë brenda një sigle, që lidhen me kontrollin që duhet të ketë çdo ekzekutiv nga parlamenti, përfshirë dhe kryeministri në mënyrë që ne të mos jemi vendi i vetëm në Ballkan në të cilin një publik, një popull i tërë nuk ka mundësi të delegojë sovranitetin. Ju e dini që pas ndryshimeve kushtetuese të vitit 2008 populli shqiptar përveçse zgjedhjeve për pushtetin vendor, nuk ka mundësi që të delegojë dëshirat e veta nëpërmjet deputetëve, pra i është marrë sovraniteti në një farë mënyre sepse listat e mbyllura, proporcionali-rajonal i ktheu partitë nga organizime vullnetare të cilët funksiononin deri në atë kohë partitë e mëdha në Shqipëri me komitete drejtuese, këshilla kombëtarë, me alternativa, me mendime ndryshe u kthyen në parti ku në zgjedhjet e vitit 2009, 2013 dhe 2017, njerëzit nuk dinin a do ishin apo jo deputetë. Listat kryetarët i kanë dërguar në afatet e fundit, në orën 24:00. Fushata elektorale nuk janë bërë në Shqipëri pas ndryshimeve kushtetuese sepse partitë e mëdha kanë informacione të bollshme dhe e dinë ku e kanë fuqinë e tyre politike nëpër zonat e tyre dhe listat e mbyllura, ato që kanë qenë në vende të sigurta nuk kanë bërë fushatë fare. Ato që nuk kanë qenë në vende të sigurta nuk kanë bërë fushatë sepse nuk kanë pse të bëjnë fushatë kur e dinë që janë kot në garë se nuk shkojnë deputetë. Skemën e prishi largimi i opozitës dhe futja e atyre deputetëve që kryetarët nuk e kishin imagjinuar kurrë që do ishin deputetët e tyre”, tha ai.
Kryeinspektori i Përgjithshëm theksoi se duhet të ketë marrëveshje në mënyrë që të çelen negociatat. Sa i përket pretendimeve të opozitës, Hajdari tha se ato nuk janë bërë në kohën e duhur.
“Unë mendoj që do të arrijnë marrëveshjen se kryetari i PD vetëm një pikë kundërshton. Këto ndryshime që lidhen me vjedhjen e votës, manipulimin e votës ishin minimale, duhet të ishin bërë me kohë. Këto ndryshime që ka rekomanduar OSBE-ODIHR them se do kalojnë këto ditë falë edhe mbështetjes së ambasadorëve”, shtoi ai.
Ai komentoi edhe deklaratat e ambasadores së SHBA, duke e konsideruar një sjellje fantastike e denjë për një diplomate.
“E gjithë sjellja e ambasadores është korrekte, siç janë amerikanët që lënë gjurmë me sjelljen e tyre ajo ka lënë dhe një propozim, siç është sistemi danez”, tha ai.
