Gjykata greke ka dhënë sot masën e dënimit për dy autorët e vrasjes brutale të studentes greke, Eleni Topaloudi.
Një shqiptar dhe një grek janë shpallur fajtorë për vrasje dhe përdhunim, nga Gjykata e Shkallës së Parë, të Athinës. Mësohet se ata janë dënuar me burgim të përjetshëm.
Sipas mediave greke, nëna e viktimës shpërtheu me zemërim në lot pas seancës gjyqësore.
“Atëherë nëna e Elenit i bërtiti të riut, duke duartrokitur: “Fëmija nuk po kthehet. Çfarë lehtësie për një 17-vjeçar? Ata dhunuan dhe vranë fëmijën tim”, ndërsa më pas doli nga salla e gjyqit duke qarë, teksa pjesëmarrësit e duartrokitën”, shkruajne mediat greke.
Jashtë gjykatës ndodheshin edhe disa anëtarë të organizatave të grave, të pajisura me parulla në favor të kujtimit të së ndjerës, Eleni Topaloudi.
“Kurrë mos harroni atë që i bënë Elenit, asnjë vrasje tjetër”, bërtisnin njerëzit që ishin mbledhur jashtë Gjykatës së Apelit.
Kujtojmë se ngjarja në fjalë ka ndodhur në nëntor të vitit 2018 në Rodos, ku një grek dhe një shqiptar përdhunuan dhe më pas hodhën në det trupin e një studenteje.
