Kryetarja e LSI-së, Monika Kryemadhi, ka ashpërsuar tonet ndaj Ramës dhe Veliajt, lidhur me shembjen e Teatrit. Ajo ka paralajmëruar për përplasje nëse preket Teatri Kombëtar. Në një lidhje me “News24”, Kryemadhi zbuloi se dispononte disa foto që tregojnë se Rama ka bërë gati botet me ujë dhe bombolat e gazit për protestuesit. Mbrëmjen e djeshme, krah artistëve qëndroi Basha, e ndërsa sot do të jetë Kryemadhi. Ajo tha publikisht se asnjë fadromë nuk do hyjë, në të kundërt do përballen me një revoltë të hapur.
“Dje ishte z. Basha, sot është radha ime për të ndenjur natën. Dezhurnin si të thuash. Nesër do jetë dikush tjetër. Është mbështetje morale dhe fizike. Nuk do guxojë të hyjë asnjë fadromë pa kaluar mbi trupat tanë. Aty jam unë dhe le të shkelin trupin tim. Z. Rama i ka bërë gati fadromat, ka lajmëruar dhe gardën dhe FNSH, më çuan fotografi që ka bërë gati botet me ujë dhe bombolat me gaz lotjsellës.
Ndryshe nga herët e tjera, unë do të qëndroj aty. Me diagnostikimin që kam unë, nëse hidhet gaz lotsjellës, unë vdes në vend. Një pikë gjak po ra në atë shesh, është kokë më kokë me Edi Ramën”, deklaroi Kryemadhi.
