Dega e Partisë Demokratike të Dibrës ka bërë kallëzim penal ndaj Kryetarit të Bashkisë, Dionis Imeraj.
Sipas një deklarate zyrtare, PD e Dibrës akuzon Imerajn se ka kryer procedura tenderimi gjatë periudhës së pandemisë së koronavirusit të cilat janë të lidhura drejtpërdrejtë me situatën emergjente.
Përkatësisht, PD i referohet tenderit me objekt “Ndertim i Linjës së Furnizimit me ujë të pijshëm Gurra e Epërme-Luzni-Peshkopi”.
“Kemi kërkuar nga SPAK dhe KLSH të nisin sa më shpejt hetimet dhe të ndalojnë vjedhjet dhe babëzitë me tenderat publikë. Me regjistrimin penal të kësaj çështje nga SPAK, ne kërkojmë që drejtësia të jetë e shpejtë dhe të nxjerrë para përgjegjësisë ata që e kanë mendjen tek vjedhjet, kur dibranët dhe shqiptarët janë pa mbështetje dhe gjendja po përkeqësohet”, thuhet në deklaratën e degës së PD Dibër.
DEKLARATË E KRYETARIT TË PARTISË DEMOKRATIKE DIBER, NAIM GAZIDEDE:
“Partia Demokratike Dega Dibër me datë 04.05.2020 ka denoncuar në Prokurorinë e Posaçme SPAK dhe KLSH për shpërdorim detyre dhe shkelje të barazisë në tendera, kryetarin e pazgjedhur të Bashkisë Dibër, Dionis Imeraj, dhe personat e tjerë përgjegjës për zhvillimin e tenderit me objekt “Ndertim i Linjës së Furnizimit me ujë të pijshëm Gurra e Epërme-Luzni-Peshkopi”.
Partia Demokratike as ka qenë, as është kundër investimeve publike të bashkisë Dibër.
Situata e sotme ekonomike shumë e rëndë, shkaktuar nga pandemia Covid 19 dhe shpallja e fatkeqësisë natyrore që çoi në shkatërrim të ekonomive të dobëta familjare, që çoi në rrezikun e falimentimit të biznesit, ku numri i të papunëve rritet çdo ditë, kjo situatë duhet të diktonte një vëmendje të shtuar të Bashkisë, ku prioritet i prioriteteve do të ishte ndihma, përkrahja, mbështetja për familjet në nevojë, bizneset, fermerët, blegtorët etj.
Për fatin e keq vëmendja e Kryetarit të Bashkisë dhe bashkëpunëtorëve të tij ishte përqendruar në prokurimin e Ndërtimit të Ujësjellësit të sipërpërmendur në paligjshmëri të plotë, duke sfiduar jo vetëm situatën e krijuar nga Pandemia, por edhe Agjencinë e Prokurimit Publik, e cila, në mbështetje të nenit 13 të Ligjit Nr. 9643 datë 20.11.2006 “Për prokurimin publik”, të ndryshuar, sjell në vëmendje si më poshtë vijon:
“Autoritetet kontraktore duhet të vijojnë procesin e prokurimit vetëm për ato procedura prokurimi që lidhen ngushtësisht me mbulimin e nevojave të dala në kuadër të situatës së shkaktuar nga pandemia Covid 19 dhe që konsiderohen të domosdoshme.
Në kuptim të sa më sipër, autoritetet kontraktore të pezullojnë të gjitha procedurat e prokurimit, përfshirë këtu edhe procedurat e prokurimit me vlerë të vogël, për objekte prokurimi, të cilat nuk lidhen ngushtësisht me këtë situatë.
Gjithashtu, të pezullohen edhe ato procedura prokurimi që janë në proces, objektet e të cilave nuk lidhen me situatën e shkaktuar nga pandemia.”
Në këto kushte, Bashkia Dibër duhet të merrte në konsideratë Udhëzimet e APP-së dhe duhet të pezullonte menjëherë procedurat e tenderimit. Me këto veprime, Kryetari i Bashkisë Dibër, duke zhvilluar tenderin me datë 04.05.2020 ka kryer veprën penale “shpërdorim detyre”.
Ndaj kemi kërkuar nga SPAK dhe KLSH të nisin sa më shpejt hetimet dhe të ndalojnë vjedhjet dhe babëzitë me tenderat publikë. Me regjistrimin penal të kësaj çështje nga SPAK, ne kërkojmë që drejtësia të jetë e shpejtë dhe të nxjerrë para përgjegjësisë ata që e kanë mendjen tek vjedhjet, kur dibranët dhe shqiptarët janë pa mbështetje dhe gjendja po përkeqësohet”.
