Kryeministri Edi Rama përmes një video-mesazhi të publikuar në Facebook, iu ka bërë thirrje qytetarëve shqiptarë që të bëjnë pak durim, në këtë periudhë ku vendi është prekur nga koronavirusi.
“Ju jeni jetimë lufte dhe si të tillë, ne nuk mund t’ju lëmë vetëm. Kini vetëm pak durim. Nuk do t’ju lëmë vetëm. Nuk do iu themi vrisni veten! Shyqyr ka rënë ajo ‘bu bu bu’ po vdesim për bukë. Nuk ka asnjë rast vdekje për bukë që nga koha e Skënderbeut. Me aq sa kemi mundësi, nuk do iu lëmë vetëm. Por mos na kërkoni përtej asaj që kemi mundësi sepse biem pastaj në një gropë dhe bëhemi gazi i botës”, tha Rama.
Kreu i Qeverisë në vijim i mëshoi faktit se pagesa e energjisë elektrike është e panegociueshme:
“Nëse ju nuk paguani asgjë me çfarë të ardhurash pretendoni se ky shtet do iu mbajë të gjithëve? Dritat nuk negociohen në asnjë rast. Taksat për ato pjesë që kanë të bëjnë me atë që është marrë dhe është fituar nuk negociohen. Nuk flitet fare për këtë, fare.
Ndërsa… ata të cilët janë larguar nga puna sepse kompania i ka pezulluar, të jenë të sigurt që ne nuk do i lëmë vetëm. Si? Sa? Do na jepni edhe pak kohë.
Duhet të kuptojmë kapacitetet tona, të shikojmë të sëmurët, shtretërit dhe nga ajo të kuptojmë si po ecën Shqipëria përballë këtij armiku të padukshëm. Ka ndonjë shqiptar sot që është duke vuajtur për të marrë frymë dhe që nuk shtrohet dot në spital? JO”.
