Drejtori i Përgjithshëm i Policisë së Shtetit, Ardi Veliu ka njoftuar se janë ngritur 66 pika kontrolli në qytetet më të rëndësishme të vendit.
Në një deklaratë për mediat, Veliu sqaroi se janë ngritur pika kontrolli në Shkodër, Lezhë, Tiranë, Elbasan, Fier, Lushnjë e Vlorë.
Ai përsëriti edhe një herë thirrjen për personat që kanë ardhur nga zonat e prekura nga koronavirusi, që të vetëkarantinohen përndryshe do të gjobiten.
“Që prej ditës së djeshme, Policia e Shtetit dhe ushtria janë duke kryer kontrolle në qytetet e Tiranës, Lezhës, Lushnjës, Fierit, Shkodrës, Vlorës etj. Kontrollet e policisë janë bërë në 66 pika. Ne bëjmë jo vetëm kontrolle të qytetarëve që vijnë nga jashtë, por regjistrojmë numrat dhe iu tërheqim vëmendjen.
Nëse këta shtetas nuk bëjnë vetë-karantinimin, do të gjobiten 5000 euro. Nëse nuk iu përmbahen rregullave, ata identifikohen lehtë, pasi kemi sistemin e gatshëm. Do kontrollohet në çdo qytet që të jetë. Të gjithë qytetarët të respektojnë vetë-karantinimin”, tha Veliu.
