Në një kohë kur spitali i Durrësit është kthyer në karantinë, Ministrja e Shëndetësisë Ogerta Manastirliu ka dhënë lajmin e mirë se 84 mjekë në spitalin në fjalë, kanë rezultuar të painfektuar me koronavirus.
“Të gjithë testimet janë negative. Mjekët dhe infermierët kanë punuar me të gjithë protokollet e mbrojtjes personale dhe udhëzimet e OBSH-së. Sot kemi testuar 84 raste të mjekëve, ku kanë dalë rezultate negative. Po bëhet një punë e madhe në territor, qoftë sa i përket informacionit qoftë sa i përket shërbimit”, tha Manastirliu.
Në vijim, ministrja iu përgjigj akuzave të kryetarit të PD-së Lulzim Basha.
Ajo pohoi se “24 orët e fundit janë 3 fakte që hedhin poshtë akuzat e Lulzim Bashës: maskat, spitali i Durrësit dhe pajisjet e mbrojtjes personale”.
“Nuk do të merrem më me Lulzim Bashën sepse në këtë moment krize kemi vendosur të merremi me armikun, koronavirusin”, u shpreh Manastirliu.
