Sekretari i Përgjithshëm në PD, Gazment Bardhi shprehet se Ministrja e Shëndetësisë, Ogerta Manastirliu ka dhënë urdhër që spitali i Kavajës të kthehet në një karantinë, në rast se evidentohen raste nga koronavirusi.
Përmes një postimi në Facebook, Bardhi e dënon ashpër këtë gjë, pasi sipas tij spitali i përzgjedhur ndodhet në një qendër të banuar.
Bardhi e cilëson këtë si një provokim të rëndë për Kavajën, teksa i drejtohet kryeministrit që karantinën ta ndërtojë në Surrel dhe jo në Kavajë.
Reagimi i Bardhit:
Sot në repartin e patologjisë dhe urgjencës në Spitalin e Kavajës kanë nisur përgatitjet, me urdhër të Ministres së Shëndetësisë, për ta kthyer në Karantinë.
Kjo është papërgjegjshëri!
Zgjedhja e një spitali të një qendre të banuar për Karantinë është kërcënim serioz për jetën e të gjithë banorëve.
Ky është një provokim i rëndë me Kavajën!
I bëj thirrje të gjithë bashkëqytetarëve të mi të mos e pranojnë trajtimin nga Edi Rama si banorë të parëndësishëm, jeta e të cilëve nuk ka rëndësi për Kryeministrin.
Karantinën ta ndërtojë në shtëpinë e tij në Surrel, jo në Kavajë
