Rastet e shumta të konfirmuara me koronavirus në Itali, janë bërë shkak për hapjen e panikut edhe në vendin tonë.
Më herët kryeministri Edi Rama dhe zyrtarë të tjerë kanë sqaruar se nuk ka raste të konfirmuara në Shqipëri. Ndërsa sa i përket frikës se mes të infektuarve në Itali, mund të ketë edhe shtetas shqiptarë ka ardhur sqarimi i ministrit të Jashtëm, Gent Cakaj.
Përmes një postimi në Facebook, Cakaj njofton se nuk ka informacione për raste shqiptarësh të prekur nga përhapja e koronavirusit në Itali. Sipas tij, informacioni mbi identitetin e të prekurve mbetet i rezervuar, në bazë të normativës evropiane për mbrojtjen e të dhënave personale.
Deri më tani në Itali janë shënuar më shumë 130 raste infektimi me koronavirus, ndërsa 2 persona kanë ndërruar jetë.
Postimi i plotë:
Ministria për Evropën dhe Punët e Jashtme së bashku me Ambasaden e Republikës së Shqipërisë në Itali dhe Konsullatat e Përgjithëshme në Milano dhe në Bari janë duke ndjekur nga afër situatën e emergjencës së krijuar nga përhapja e koronavirusit Covid19 në disa rajone të Italisë. Deri më tani nuk ka informacione për qytetarë shqiptarë të prekur. Informacioni mbi identitetin e të prekurve mbetet i rezervuar në bazë të normativës europiane për mbrojtjen e të dhënave personale.
Ministria për Evropën dhe Punët e Jashtme dhe Ambasada e Shqipërisë në Itali është në kontakt të vazhdueshëm me Ministrinë e Shëndetësisë së Shqipërisë, Ministrinë e Shëndetësisë të Italisë dhe me Departamentin e Emergjencave Civile të Këshillit të Ministrave të Italisë për masat e përbashkëta për parandalimin e perhapjes së virusit në territorin shqiptar.Ne iu bëjmë thirrje qytetarëve shqiptarë në Itali dhe atyre që udhëtojnë për dhe nëpër Itali t’iu përmbahen masave të përcaktuara prej autoriteteteve italiane në situatën e emergjencës.
Ministria për Evropën dhe Punët e Jashtme dhe Ambasada e Shqipërisë në Itali do të vijojnë informimin e publikut varësisht prej situatës.
