Presidenti Trump ka hapur një “luftë” komunikimi me të gjithë. Ditën e sotme ai ka kërcënuar Irakun, pas rezolutës që kuvendi i vendit miratoi, në të cilën kërkohej largimi i trupave amerikane nga Iraku.
Trump ka kërcënuar me sanksione të jashtëzakonshme në rast se Iraku ndërmerr lëvizje të tilla.
“Ne atje e kemi një bazë ajrore jashtëzakonisht të shtrenjtë. Ka kushtuar miliarda dollarë për t’u ndërtuar. Ne nuk do të largohemi derisa të na e shpaguajnë atë. Sanksionet ndaj tyre do jenë si kurrë në ndonjë vend tjetër”, tha para gazetarëve kreu i Shtëpisë së Bardhë.
Sipas tij, sanksionet do jenë të një përmase të që nuk është parë kurrë më parë.
Marrëdhëniet e Shteteve të Bashkuara me Irakun dhe Iranin u tensionuan pas vrasjes së gjeneralit iranian, Qasem Soleimani, përmes një sulmi me dron nga forcat amerikane në Bagdad.
Pasardhësi i Soleimanit në pozitën e komandantit të forcave Kuds, Esmail Qaani, është zotuar se do ta vazhdojë misionin e ushtarakut tashmë të ndjerë. “Ne premtojmë se do ta vazhdojmë rrugën e martirit Soleimani me të njëjtën forcë dhe dëmshpërblimi i vetëm për ne do të ishte largimi i Amerikës nga rajoni”, tha ai.
