Në mbledhjen e Këshillit Bashkiak të Tiranës, kryeministri Rama tha se është gati edhe skema e riparimeve për godinat e padëmtuara në strukturë nga tërmeti i 26 nëntorit. Ai konfirmoi se qeveria në koordinim të ngushtë me Bashkinë, ka vendosur që të mbështesë financiarisht familjet e prekura nga tërmeti. Sipas tij, 60% e familjeve të pastreha, të cilat humbën shtëpitë nga tërmeti, mund të futen në shtëpi të re. Qiraja do të mbulohet nga shteti.
“Erdha për të shfrytëzuar këtë mbledhje të Këshillit Bashkiak, edhe për faktin që me ndihmën e qeverisë, Këshilli juaj sot mund të miratojë për 554 familjet e para që janë të prekura drejtpërdrejt, dhe nuk mund të kthehen në shtëpitë e tyre.
Në një skemë që e kemi dakordësuar me kryetarin e Bashkisë, dhe do ta aplikojmë edhe në Bashkitë e tjera ku ka problematikë të ngjashme me perimetrin e gjendjes së emergjencës së fatkeqësisë natyre, që janë për një vit. Pra me këtë masë, që tani 60% e familjeve të pastreha, për shkak të tërmetit, mund të futen në shtëpi të re.
Pra, qiraja mbulohet 100 nga ne. Ndërkohë më vjen mirë që do kalojë procedura e veçantë për riparimet, në mënyrë që lejet e riparimeve të kenë procedurë të përshpejtuar. Çdo projekt i meremetimeve të garantohet jo nga një, por nga tre inxhinierë të lincesuar, në mënyrë që Bashkia ta japë lejen e meremetimit brenda 24 orësh. Mundësisht për vetë firmat, sepse janë ato që duhet ti bëjnë”, tha Rama.
