Gazetari Mentor Kikia ka reaguar pas refuzimit nga ana e Presidentit të Republikës, të dekretimit të Skënder Gjinushit në krye të Akademisë së Shkencave.
Me anë të një postimi në rrjetet sociale, ai e ka cilësuar si një refuzim dinjitoz aktin e ndërmarrë nga kreu i Shtetit.
Në komentin e tij, Kikia nënvizon faktin se zgjedhja e një politikani karriere teksa kishte ende emrin në KQZ si pjesëmarrës në zgjedhjet vendore, është një turp për Akademinë e Shkencave, një turp për botën akademike në tërësi, dhe një turp për të gjithë shoqërinë.
Statusi
Një refuzim dinjitoz i presidentit Ilir Meta
Presidenti Ilir Meta nuk e dekreton Skënder Gjinushin si Kryetar të Akademisë së Shkencave.
Pavarësisht arsyeve që ka apo që mund të ketë, ky është një veprim i drejtë. Zgjedhja e një politikani karriere, ndërsa kishte ende emrin në KQZ si pjesëmarrës në zgjedhjet vendore, është një turp për Akademinë e Shkencave, një turp për botën akademike në tërësi dhe një turp për të gjithë shoqërinë. Akademia e Shkencave nuk është ministri, ku titullari është post politik. Kreu i Akademisë së Shkencave duhet të jetë një figurë elitare e shoqërisë, duhet të personifikojë jo vetëm studiuesin dhe akademikun, por edhe personalitetin e padiskutueshëm publik.
