Pas humbjes së thellë 3-0 të skuadrës së Kukësit, ndaj skuadrës së Debrecenit, ka reaguar edhe trajneri i skuadrës shqiptare. Teniku, Ernest Gjoka deklaroi për mediat se humbja me 3 gola nuk pasqyron lojën në fushë dhe thekson se ka akoma shpresa për ta në takimin e kthimit.
“Luajtëm një ndeshje shumë të mirë, sidomos në pjesën e parë. Patëm edhe ne rastet tona për të shënuar, por nuk i konkretizuam. Nuk mendoj se fitorja me tre gola është rezultati i drejtë i sfidës. Do të jetë një detyre shumë e vështirë në ndeshjen e kthimit. Shpresojmë që të shënojmë të paktën një gol shpejt, që të kemi shpresa të kthejmë ndeshjen”, tha Gjoka.
Trajneri i Debrecenit, Andras Herczeg dha gjithashtu komentin e tij pas ndeshjes së zhvilluar, duke u shprehur se 3 gola janë një avantazh i madh por se ata nuk do kënaqen me kaq dhe do mobilizohen më shumë për ndeshjen e radhës.
“Ishte fantastike të shihje më shumë se 10 mijë tifozë në stadium. Falenderimet i takojnë ekipit në fushë. Ne e nisëm shumë mirë ndeshjen, më pas Kukësi mori kontrollin e ndeshjes, duke goditur edhe shtyllën. Bëmë disa gabime, por më pas ndryshuam vendosjen. Gjatë pushimit fola me lojtarët, dhe në pjesën e dytë luajtëm më mirë, shënuam edhe tre herë. Tre gola janë avantazh i madh, gjithsesi nuk duhet të qëndrojmë pas e të kënaqemi me kaq. Duhet të shfaqim përqendrin edhe në ndeshjen e dytë, e të bëjmë një lojë të organizuar. Duhet të nisim si të ishim 0-0”, u shpreh Herzeg.
