Mëngjesin e sotëm kreu i Shtetit Ilir Meta përgjatë një deklarate mediatike theksoi se shfuqizimi i dekretit të zgjedhjeve ka qenë një veprim mjaft normal.
Madje duke ironizuar, presidenti tha: “Nuk kam anuluar zgjedhjet në SHBA, Itali apo Kinë, por në Shqipëri”. Lidhur me këtë deklaratë të Metës, ka reaguar Ministrja e Shtetit për Marrëdhëniet me Parlamentin, Elisa Spiropali.
Kjo e fundit ka bërë një postim në Twitter ku shkruan në mënyrë ironizuese se “bota duhet ta mbyllë gojën se në Shqipëri vendos Meta se kur voton populli”.
“Ilir Meta që pa gdhirë tha se nuk ka anuluar zgjedhjet në SHBA, Itali apo Kinë, kështu që bota duhet ta mbyllë gojën se në Shqipëri vendos Ai se kur voton Populli. Domethënë sa të kem Lulin dhe Monën me vete s’pyes për Amerikën dhe Evropën – historia që përsëritet si komedi me Haxhiun e ri”, shkruan Spiropali.
