Presidenti Ilir Meta, pasi anuloi 30 qershorin si datë për zgjedhjet lokale ka nisur ditën e sotme takimet në Presidencë me partitë aleate të PD për caktimin e një datë të re për zgjedhjet.
Pas takimit ku mori pjesë Agron Duka, Dashamir Shehi, Vangjel Dule, Arjan Madhi dhe Nard Ndoka, ishte Shehi që foli për mediat.
Ai u shpreh se ishte një takim pozitiv dhe se si person e çmojmë shumë presidentin për aktin që mori për ti dhën kohë politikës të zgjidhë krizën që ka pushtuar vendin.
Shehi tha kjo nuk do të jetë thjesht për përcaktimin e datës së zgjedhjeve, por kjo kohë duhet të shërbejë për të arritur marrëveshje të mëdha politike. Po ashtu paralajmëroi se nëse mazhoranca do të vazhdojë me idenë për të zhvilluar ndeshjet më 30 qershor do të ketë beteja të tjera dhe se nuk do të ishin në të mirë të vendit.
“U munduam të sqarojmë situatën e sotme. E falënderuam për mundësinë që i ka dhënë politikës për të gjetur një zgjidhje. Si person e çmojmë shumë presidentin. Në një situatë kaq të rëndë, idetë janë të përgjithshme, nuk kemi ndonjë avancim sa i përket datës së zgjedhjeve, pasi aksioni opozitar është përtej zgjedhjeve.
Ne gjykojmë që sot të paktën që dita e zgjedhje do të derivojë nga një marrëveshje politike, ku do të merren parasysh pretendimet opozitare për zgjedhje të lira e të ndershme, takimi ishte shumë pozitiv, gjykojmë që është bërë një hap i vogël, por në drejtim e duhur. Data e zgjedhjeve nuk mund të jetë si një dëshirë, s’do të dalë vetvetiu nga marrëveshjet politike. Nuk kishte një propozim konkret në tryezë, do të vazhdojë një diskutim , Presidenti Meta do të thërrasë edhe aleatët e tjerë.
Ne nuk kemi tager të mbyllim marrëveshje, pasi e ka kreu i opozitës, Lulzim Basha. Por ishte një hap i vogël pozitiv.
Data e zgjedhjeve do të dalë vetvetiu nga marrëveshjet politike. Nëse data e zgjedhjeve do të dalë sa për të marrë kohë, kjo nuk do të ishte zgjidhje e krizës politike, duhen shumë marrëveshje dhe diskutime.
Shpresojmë që pala tjetër të mos ketë luajtur mendsh dhe të vazhdojë me idenë për të zhvilluar zgjedhjet më datë 30 qershor. Nëse po do të bëhemi gati për beteja dhe rrethana të tjera që nuk do të ishin në të mirë të vendit”, tha Shehi pas takimit me presidentin Meta./ Tirana Today
