Kryetari i Kuvendit, Gramoz Ruçi po zhvillon një vizitë treditore në Hagë, ku pritet të takohet me zyrtarë të lartë të parlamentit Holandez. Në këtë vizitë, Ruçi shoqërohet nga kreu i grupit parlamentar i Partisë Socialiste, Taulant Balla dhe deputetja demokrate, Rudina Hajdari.
Vizita zhvillohet pak ditë para publikimit të raportit të progresit të Komisionit Europian ku pritet rekomandimi për hapjen e negociatave me Shqipërinë.
Axhenda nis me një takim informativ me ish-ambasadorin holandez të OSBE në Tiranë Robert Bosch, i cili ka kundërshtuar parlamentin e tij, duke thënë se shqiptarët nuk janë të gjithë kriminelë e nuk mund të futen të gjithë në një thes.
Mëngjesin e së martës, Gramoz Ruci do ta nisë me një takim me Kryetaren e Dhomës së Dytë të Parlamentit holandez, Kadija Arib. Pasditen e së martës, Ruci dhe delegacioni që e shoqëron atë, kryetari i grupit të PS-së Taulant Balla dhe kryetarja e grupit demokrat në parlamenti, Rudina Hajdari do të zhvillojë një seancë dëgjimore me komisionin e Çështjeve evropiane, komision i cili do të përcaktojë vendimin e Holandës ndaj Shqipërisë.
Më tej, ditën e mërkurë, Ruçi do ta takohet me Kryetaren e Senatit Holandës, Ankie Brokers – Knol dhe me senatorë holandezë.
Kujtojmë se në 16 prill, parlamenti holandez votoi për rikthimin e regjimit të vizave për shqiptarët me pretendimin se numri i shqiptarëve të përfshira në veprimtari kriminale ishte rritur.
