3 vite më parë, këngëtarja Fjolla Morina humbi partnerin e saj, si pasojë e një atentati ndaj tij në Sukth. Vuajtjet për të duket sikur nuk kanë fund. Shumë vite më parë, 33-vjeçarja ka humbur të atin. E ftuar në “Prive”, Fjolla Morina zgjodhi që të mos fliste për përjetimet e saj.
Javën e kaluar, ajo publikoi një këngë dedikuar njerëzve që nuk janë më. “Kjo këngë nuk është vetëm për mua, është për të gjithë. Sigurisht, unë kam humbur disa nga njerëzit e mi më të dashur. Por, dua t’i mbaj disa gjëra personale”.
Çasti më prekës i intervistës ishte kur u desh të fliste për vargjet dedikuar humbjes së fëmijës. Fjolla e cila është nënë e dy fëmijëve, një vajze adoleshente dhe një vajze 4 vjeçe, u përlot teksa kujtonte skenën e funeralit, të cilën e xhiroi për videon e këngës “Si ta pranoj”.
“Është shumë e rëndë kur nëna humb një fëmijë. Është diçka shumë emocionuese për mua. Ka qenë shumë e vështirë ta xhiroja, sepse jam tip i ndjeshëm”.
