Kryetarja e Lsi, Monika Kryemadhi ka folur për protestën e ditës së sotme, ndërsa deklaron se gjithçka realizohet në bazë të një strategjie dhe plani.
Sipas saj, kryeministri Rama largohet gjithnjë kur ka protesta sepse është i frikësuar dhe nuk ka guxim të përballet me opinionin mbi situatën në të cilën ndodhet vendi, teksa pohoi se në të kaluarën asnjë kryeministër nuk është larguar, por kanë qëndruar në zyrat e tyre.
“Ne nuk pamë qytetarë të irrituar, përkundrazi ishin solidarë. Pamë shumë makina që kishin hapur krahun në anë të rrugës, duke treguar solidaritet. Ky është një nga hapat që ka hedhur opozita, e do të ketë vazhdimësinë e saj. Gjithçka është në bazë të një strategjie dhe plani, që do të jetë i befasishëm. Pse? Sepse kryeministri është larguar gjithnjë sa herë ka pasur protesta dhe nuk ka tentuar të qëndrojë e të përballet me njerëzit. Kjo tregon frikën që ka ai, ose s’do të përballet me opinionin mbi këtë situatë.
“Kjo është një zgjedhje e gabuar e Ramës, pasi një ditë ai do të përballet me njerëzit. Çdo ditë që ai qëndron, fati i tij bëhet gjithnjë e më i zi, meqë i ka qejf këto fallxhoret”, deklaroi Kryemadhi.
Sa i përket përgjimeve të zbardhura nga “Zëri i Amerikës”, Kryemadhi tha se “e çuditshmja këtu është fakti që për dosjen 339 nuk ka ende hetime nga prokuroria, nuk dihet përse nuk veprohet edhe sot”.
