Ndonëse nuk foli për një skenar konkret, kryedemokrati Basha sërish i mëshon fort faktit se nuk mund të ketë zgjedhje të lira, pa largimin e kryeministrit Rama. Pas tryezës me gazetarë, Basha është pyetur se si do i shtyjnë zgjedhjet, në një kohë kur opozita është shprehur se “zgjedhje me Edi Ramën nuk ka”. Kreu i PD tha se Shqipëria është në nivelin më të keq në 28 vite, dhe se zgjidhja e vetme është largimi i Ramës, për ti dhënë fund ngërçit politik e ekonomik.
“Është e qartë për çdo shqiptar për mbarë botën, se Shqipëria është në një krizë të thellë politike dhe shkaku janë zgjedhjet e blera në 2017. Për të mbrojtur veten e tij dhe gjithë kupolën e organizatës së Rilindjes.
Zgjidhja e vetme politike është ajo që ka propozuar PD, këto zgjedhje që të zhvillohen të lira. Parakusht është largimi i Edi Ramës. Për të gjitha çështjet e thëna, mendoj se sot është dita të thellohemi, se Shqipëria është në nivelin më të keq në 28 vite.
Kjo gjendje duhet të marrë fund, dhe ka vetëm një rrugë, largimi i Edi Ramës. Preokupimi kryesor është dhe duhet të jetë dhënia fund e emigracionit, zgjidhje të krizës me njeriun që e bëri Shqipërinë si Kolumbi nuk mund të ketë”, tha Basha.
