Pas pjesëmarrjes në evropianin Francë 2016, kombëtarja shqiptare u zhyt ne një ‘humnerë’ nga e cila nuk po del dot. Pas largimit të Gianni De Biasi, një tjetër italian e pason atë në stolin e kuqezinjve. Ai ishte Christian Panucci. Edhe pse erdhi me bujë dhe pritshmëri të larta, përsëri numri i ndeshjeve të humbura nga kuqezinjtë ka qenë më i lartë se ai i të fituarave nën drejtimin e Panuccit.
Shansi i fundit për Panuccin ishin eliminatoret e Evropianit 2020. Ndeshja e parë u zhvillua të premten në “Loro Boriçi” të Shkodrës, ku kuqezinjtë kapitulluan përballë Turqisë, duke u mposhtur 0-2. Një humbje që rezultoi fatale për fatin e italianit në stolin e kombëtares shqiptare, pasi një ditë më pas FSHF vendos ta shkarkojë nga posti i trajnerit.
Kështu Christian Panucci e mbyll aventurën me kuqezinjtë, ku në 15 ndeshje që drejtoi arriti të merrte vetëm 4 fitore, 2 barazime dhe 6 humbje.
Tirana Today pyeti qytetarët se kë fajësojnë ata për rezultatin e Shqipërisë në ndeshjen e parë eliminatore dhe si e shohin vendimin e FSHF-së për të larguar trajnerin italian.
“Ishin një lojë shumë e dobët nga lojtarët shqiptarë. Dhe normalisht që për tu fajësuar ishte Panucci. Ia kanë bërë shumë mirë që e kanë hequr si trajner. Të rikthenin Gianni De Biasin do të ishte më mirë.”
“Largimi i Panuccit është i drejtë, sepse nuk i ka sjellë asgjë të mirë skuadrës. Përkundrazi vetëm humbje.”
“Në fushë janë lojtarët, ata kanë fizikun, shpirt e zemër dhe mund të luajnë. Ndërsa trajneri nuk ka çfarë të bëjë i shkreti.”
“Pak a shumë e prisnim një rezultat të tillë, nuk mendonim se do të ndodhte diçka ndryshe. Për tu fajësuar janë portieri dhe lojtarët. Sepse ja vënë fajin vetëm Panuccit, por nuk ka lidhje.”
Shqipëria pas 3 ditësh do të përballet me Andorrën dhe në pankinën e kuqezinjve do të jetë Ervin Bulku dhe Sulejman Mema. Duket se ky është një vendim vetëm për këtë përballje, pasi FSHF është në kërkim të një emri tjetër për të marrë drejtimin e pankinës kuqezi për të vazhduar ‘luftën’ për një biletë në Evropian. Por, përsëri qytetarët duket se nuk janë besimplotë për një rezultat pozitiv për kuqezinjtë.
“Mendoj se do të humbasim prapë. Parashikoj një rezultat 1-0 për Andorrën dhe pse nuk e dëshiroj këtë gjë. Por, nuk besoj se do të fitojmë.”
“Nëse humbasim dhe me Andorrën, pastaj nuk kemi çfarë të themi më. E vetmja mënyrë që të fitojmë është të fusin Sadikun në lojë. Sigurisht që do të zhgënjehemi shumë, por përsëri skuadrën tonë nuk e tradhtojmë.”/ TIRANA TODAY
