Cristiano Ronaldo ishte fantastik në ndeshjen përballë Atletico Madrid e cila u zhvillua në Torino. I vetëm ylli portugez kualifikoi bardhezinjtë për në fazën tjetër të Champions League, pasi përmbysi një rezultat 2-0 me 3 golat e tij. Por gjatë festimit të golit të tretë ai ka bërë një gjest të pahijshëm, duke imituar Simeonen që e bëri në ndeshjen e parë.
Ky gjest nuk ka kaluar lehtë, pasi UEFA nisi një hetim ndaj yllit portugez. Pas hetimeve UEFA ka vendosur që Ronaldo të jetë në dy sfidat e radhës përballë Ajax, duke mos e penalizuar, por duke e dënuar vetëm me një gjobë.
Ky është lajmi ekskluziv që ka publikuar sot “Sport Mediaset”. Kjo media bën me dije se Komiteti Displinor i UEFA-s u takua dhe vendosi për dënimin e portugezit, i cili i tregoi b*olet tifozëve të Atleticos.
Kështu ai do të gjobitet si Simeone me një gjobë disi më të majme (më shumë se 20 mijë euro) dhe do të jetë rregullisht në ndeshjet kundër Ajax. Edhe nëse do të dënohet mësohet se Juventusi do të apelojë vendimin, por gjasat për dënim janë të pakta.
Mbetet të shihet nëse ky lajm ekskluziv i “Sport Mediaset” do të vërtetohet ose jo.
