Është shkarkuar nga detyra Prokurori i Prokurorisë së Përgjithshme, Arqile Koça, pasi nuk justifikonte pasurinë. Komisioni i Pavarur i Kualifikimeve, në seancën dëgjimore tha se për prokurorin Koça është hetuar në tre kriteret, kontrolli i pasurisë, kontrolli i figurës, vlerësimi profesional.
Motivi i shkarkimit mbetet ende i dyshimtë dhe jo i plotë, pasi në seancën dëgjimore, figura e tij konsiderohet i përshtatshëm për vazhdimin e detyrës. Por pritet zbardhja e vendimit të plotë nga KPK. Nga verifikimet e kryera nga KPK, rezulton se prokurori ka bërë deklarim të saktë, dhe në përputhje me ligjin.
Po kështu, ILDKPI ka theksuar në relacion se prokurori Koca ka burime të ligjshme, nuk ka kryer fshehje të pasurisë dhe nuk gjendet në kushtet e konfliktit të interesit.
Përsa i përket hetimit të kryer nga KPK, janë konstatuar tetë apartamente, dy garazhe, dhe dy makina, të cilat rezultojnë të jenë përfituar nga një shoqëri private, e që origjina është verifikuar. Gjatë hetimit rezultoi se subjekti nuk është favorizuar nga kjo shoqëri ndërtimi.
Në lidhje me pastërtinë e figurës, Drejtoria e Sigurisë së Informacionit të Klasifikuar ka dorëzuar një raport me konstatimin se subjekti Arqile Koça ka plotësuar saktë formularin dhe është i përshtatshëm për vazhdimin e detyrës. Sa i përket kriterit të tretë, sipas Komisionit të Pavarur të Kualifikimit, ka rezultuar se prokurori Arqile Koça ka treguar aftësi profesionale, nivel të lartë etike dhe angazhim profesional. Arqile Koça zëvendësoi Rovena Gashin, pas shkarkimit të kësaj të fundit.
