Policia greke godet një grup të trafikut ndërkombëtar të drogës nga Shqipëria në Greqi. Grupi trafikonte marijuanë përmes kufirit greko-shqiptar në Igumenicë dhe më pas e transportonte në Athinë.
I njëjti grup kryente dhe shpërndarjen e marijuanës por edhe drogave të forta në vende të ndryshme të Greqisë.
Gjatë operacionit janë arrestuar 21 shtetas shqiptarë e grekë në qytete të ndryshme të Greqisë. Janë sekuestruar 142.5 kg marijuanë, 3.3 kg kokainë, 1 pistoletë dhe 16.756 euro.
Këtij grupi në operacione të mëparshme i janë sekuestruar 140 kg marijuanë, 650 gram kokainë dhe 400 gram heroinë, ndërkohë që llogaritet që prej shtatorit 2018 ky grup ka arritur të trafikojë e shesë rreth 500 kg marijuanë, 6 kg kokainë dhe 1 kg heroinë.
Operacioni ndërkombëtar i policisë greke u bë i mundur në bashkëpunim me autoritetet në Belgjikë dhe vende të tjera evropiane.
Identifikohen si pjesëtarë të një grupi kriminal 10 shqiptarë e 1 rumun. Arrestohen 8 në Greqi, 1 në Bruksel, e shpallen 2 në kërkim që po ndiqen nga polici të vendeve europiane. Grupi kriminal akuzohet për vrasjen në prill 2018 në Kifisia të biznesmenit grek Aleksandro Stamatiadi. Grupi akuzohet për 1 grabitje banese, 55 vjedhje, 9 tentativa vjedhje, 1 tentativë vjedhje bankomati.
