Policia ka ripërsëritur thirrjen për të gjithë shqiptarët që të ruajnë distancën, kjo për të mbrojtur shëndetin e gjithësecilit. Në të gjithë vendin, punonjësit e Policisë së Shtetit janë angazhuar në zbatimin e masave kufizuese, me qëllim parandalimin e përhapjes së koronavirusit.
Njoftohet se patrullat e Përgjithshme të Policisë, në oraret e lejuara janë të pranishme pranë bankave, supermarketeve dhe marketeve, ku ka dhe grumbullime të qytetarëve, me qëllim ruajtjen e distancës së duhur.
Këto masa duhet të gjejnë zbatim nga të gjithë qytetarët pa përjashtim, për të bërë të mundur parandalimin e përhapjes së COVID-19.
Në 24 orët e fundit janë testuar 35 persona të dyshuar. Prej tyre, 6 kanë rezultuar të infektuar me koronavirusin e ri.
Zv/ministrja e Shëndetësisë, Mira Rakacolli, tha se 5 prej qytetarëve të prekur me COVID-19 janë nga Tirana dhe 1 rast nga Fieri. Deri më tani Rakacolli tha se janë testuar 732 persona në total, duke e çuar numrin e të prekurve në vendin tonë në 70.
Njoftimi
Ruani distancën nga njëri – tjetri për të mirën e shëndetit të të gjithëve
Në të gjithë vendin punonjësit e Policisë së Shtetit janë angazhuar në zbatimin e masave kufizuese me qëllim parandalimin e përhapjes së COVID-19
Patrullat e Përgjithshme të Policisë, në oraret e lejuara janë të pranishme pranë bankave, supermarketeve dhe marketeve, ku ka dhe grumbullime të qytetarëve, me qëllim ruajtjen e distancës së duhur, për të bërë të mundur parandalimin e përhapjes së COVID-19.
Policia e Shtetit u bën thirrje të gjithë qytetarëve të ruajnë distancën nga njëri- tjetri, të respektojnë oraret e lejuara të lëvizjes, si dhe të evitojnë daljet nga shtëpia pa pasur arsye thelbësore e jetike.
